علق الفنان تامر حسني، على تصدر ألبومه الجديد “لينا معاد”، الترند على موقع الفيديوهات يوتيوب، مؤكدا أنه سلك طريقا طويلا لمدة عامين من المذاكرى والاجتهاد حتى يخرج بهذا الألبوم، موضحا أنه أراد أن يقدم شيئا يحترم به ذكريات جمهوره.
كتب “حسني”، عبر حسابه على “إنستجرام”: “هنتهز الفرصة الجميلة دي إن أغنية الذوق العالي مع حبيبي اللي بموت فيه الـ King محمد منير تريند عام رقم واحد، وفي تريند الموسيقى لسه أول يوم أهوه، والـ ١٣ أغنية بتوع ألبوم لينا معاد في التريند”.
نرشح لك: استمع.. ألبوم “لينا معاد” لـ تامر حسني
أضاف: “عايز أقولكم حاجة، عشان كنت أوصل إن ألبومي يدخل التريند كله، وبعيداً عن التريند يعجبكم كده … أنا مشيت مشوار كبير، أوله إني كنت بقرأ كل تعليقاتكم السلبية قبل الإيجابية، لأني عارف إنكم بتحبوني وده خلاني أركز وأحلف جوا نفسي إني لازم أفرحكم وأخليكم فخورين بالمجهود اللي عملته”.
تابع: “وتاني حاجة احترمت ذكرياتكم اللي على صوتي، وتعبت تعب مش طبيعي، ودخلت مستشفيات نص السنة ومش بحب أقول ولا أنزل أخبار من دي.. يا جماعة أنا بحبكوا أوي، ومن يوم ظهوري وأنا واحد منكم عارف إن في ألبومات مكانتش قد توقعاتكم، وإن في ألبومات علامات مش هتتنسي. هي دي الحياة شوية كده وشوية كده بس عارف مدى حبكم لألبوم عيش بشوقك، فكان جوايا تحدي واحد بس: إني أتحدى نفسي في عيش بشوقك واتفوق عليه”.
أشار: “فضلت إذاكر السوق الغنائي وتغير أنماط الموسيقى اللي أنا بحترمها كلها، وبحترم كل الفنانين اللي نجحوا فيها.. فضلت أطور من أدائي، وإذاكر جوا الاستوديو مع مهندسين صوت لمدة سنتين وأجتهد مع الموزعين والملحنين والشعراء اللي بشتغل معاهم في تقديم أجدد شيء. ويمكن زعلوا مني كتير من كتر ما أنا عمال أغير وأعدل وأعيد من أول وجديد. بس دلوقتي فرحتي بالدنيا وهما بيشكروني قدامكم وعلى تليفوني من الإشادات اللي سامعنها منكم في حقهم”.
واصل: “اشتغلت الألبوم ده وأنا جوايا عناد رهيب إن الألبوم كله يعجبكم. أكيد هيكون في تفاوت في الإعجاب، بس المهم إنكم قدرتوا مجهودي والتنوع اللي قدمته في الأوديو والفيديو.. متشكر من قلبي لكل حد نصحني، وكل حد نقدني عشان بيحبني. أنا سمعت كلامكم وتعبت أوي وانتوا أكيد شايفين تعبت عشانكم، وعشان برضو أحاول أكون واجهة فنية موسيقية جميلة لمصر، بحكم إني بسافر كتير أغني قصاد العالم، واسمي مطرب مصري عربي”.
أردف: “شكراً صناع الألبوم عن… ألبوم لينا معاد.. وكل الشكر ليكم يا أغلى الناس. ربنا يفرحكم زي ما انتوا مفرحني دلوقتي بكلامكم الجميل”.
