تعمل ايه لو حسيت في يوم إن حقك ضاع في بنك؟ وايه الاجراءات اللى تاخدها لو البنك اتعامل معاك بطريقة ما عجبتكش وحسيت بظلم؟! وإيه الخطوات اللي ممكن تعملها عشان تاخد حقك من البنك بأسرع وقت؟البنك المركزي المصري .. اللي هو المظلة والرقيب على كل البنوك في مصر .. حدد خطوات واضحة وصريحة عشان تقدر تقدم شكواك .. وتضمن إن حقك يرجعلك بأقصى سرعة ممكنة.طب إزاي تقدم شكوى ضد أي بنك ؟الموضوع مش صعب زي ما بتتخيل .. بس فيه خطوات لازم تمشي عليها بالظبط عشان شكوتك تتاخد بجدية ويتم البت فيها .. البنك المركزي المصري حط نظام متكامل لحماية حقوق العملاء .. يعني حقك مش هيضيع طالما مشيت على الإجراءات صح.أول حاجة لازم تعملها .. إنك تقدم شكوى داخلية للبنك نفسه .. كتير من الناس بتعدي الخطوة دي وبتجري على البنك المركزي على طول.. وده غلط.. لأن البنك المركزي بيطلب منك الأول إنك تكون قدمت شكوتك للبنك.. واستنيت الرد بتاعه.. وده منطقي جدا.. لأن ممكن يكون الموضوع سوء تفاهم بسيط .. أو خطأ إداري ممكن يتحل بسرعة جوه البنك.طب إزاي تقدم الشكوى الداخلية؟تقدر تتواصل مع خدمة عملاء البنك اللي بتتعامل معاه .. سواء عن طريق التليفون .. أو البريد الإلكتروني .. أو حتى عن طريق زيارة أحد الفروع.كمان معظم البنوك الكبيرة بيكون عندها أقسام مخصصة لتلقي الشكاوى .. حاول توصل للقسم ده مباشرة لو متاح.والأفضل دايماً إنك تقدم شكوتك بشكل كتابي .. يعني إيميل رسمي .. أو خطاب مسجل بعلم الوصول .. أو طلب مكتوب ومختوم من البنك بتاريخ الاستلام .. وده عشان يكون معاك إثبات بالشكوى وتاريخها.و لازم تحتفظ بنسخة من الشكوى اللي قدمتها للبنك .. ورقم الشكوى لو فيه .. وتاريخ التقديم .. وأي مستندات أو إثباتات ليها علاقة بالموضوع.والبنك ملزم إنه يرد عليك في مدة معينة .. عادةً بتكون في حدود 15 يوم عمل .. ولو الموضوع محتاج تحقيقات أكتر أو فيه جوانب فنية معقدة .. ممكن المدة دي تزيد شوية .. بس في كل الأحوال لازم يبلغوك بالمدة المتوقعة للرد.لو قدمت شكوتك للبنك .. واستنيت المدة القانونية .. وماردوش عليك .. أو ردهم ماكانش مرضي .. أو حسيت إن البنك تجاهل شكواك أو معالجتها كانت غير عادلة .. هنا بيجي دور البنك المركزي المصري .. اللي هو الجهة الرقابية العليا المسؤولة عن حماية حقوق العملاء.بعد ما تكون استنفدت كل الطرق مع البنك نفسه .. تقدر تقدم شكوتك للبنك المركزي .. وده من خلال طرق متعددة أولها البوابة الإلكترونية للبنك المركزي.. دي أسهل وأسرع طريقة .. البنك المركزي أطلق بوابة إلكترونية موحدة لتلقي الشكاوى .. واللي بتسمح لك بتقديم شكوتك أونلاين .. ومتابعة حالتها خطوة بخطوة .. كل اللي عليك إنك تدخل على الموقع الرسمي للبنك المركزي المصري .. وتدور على قسم “شكاوى العملاء” أو “حماية حقوق العملاء”.طب إيه البيانات المطلوبة؟بياناتك الشخصية (الاسم بالكامل .. الرقم القومي .. رقم التليفون .. البريد الإلكتروني)… اسم البنك اللي بتقدم الشكوى ضده.. رقم الحساب أو رقم البطاقة أو أي بيانات تعريفية بالتعامل اللي حصل.. تاريخ الواقعة أو المشكلة.. مع شرح تفصيلي للمشكلة .. وإيه اللي حصل بالظبط.إرفاق أي مستندات تدعم شكواك .. زي إيصالات .. كشوف حسابات .. صور مراسلات مع البنك .. أو أي دليل على المشكلة.لازم تقول إنك قدمت شكوى للبنك قبل كده .. وتاريخ تقديم الشكوى .. ورقمها لو متاح .. وإيه كان رد البنك عليها (لو فيه رد).بعد ما بتقدم شكوتك للبنك المركزي .. بتاخد رقم مرجعي ليها .. وده مهم جداً عشان تقدر تتابع حالتها .. البنك المركزي بياخد الشكوى بتاعتك .. وبيراجعها .. وبيطلب من البنك اللي قدمت الشكوى ضده إنه يرد عليها ويقدم تفسير للموقف .. وبعدين بيتم دراسة الموضوع من كل الجوانب .. والبت فيه.البنك المركزي بيسعى إنه يبت في الشكاوى بأسرع وقت ممكن .. عادةً بتكون في حدود 30 يوم عمل .. لكن المدة دي ممكن تتغير حسب طبيعة الشكوى ومدى تعقيدها.بعد ما بيتم البت في الشكوى .. البنك المركزي بيبعتلك إخطار بالنتيجة .. سواء كانت الشكوى في صالحك .. أو غير كده .. وفي حالة إنها في صالحك .. بيتم إلزام البنك بتصحيح الوضع وتعويضك لو فيه ضرر حصل.
